Santu Srabadori de Horta
Ott 15th, 2008 | Di Andrea | Categoria: Stòrias - StorieSanta Coloma de Farnés 1520 – Castedd’ e Càlari 1567
Santu Srabadori est nasçu in su mes’ ‘e Idas de su 1520 a Santa Coloma de Farnés, in Catalùnnia. Abarrau òrfanu jai de pitikeddu, andat po unu pagh’e tempus a Barcelona aundi fait su sapateri po sustenni sa sorrixedda sua. Un’orta ki custa si coyat, Srabadori podit detzidi de imprassai sa vida arrelijosa ki at sempri disijau, e insandus andat po unu tempus de prova a s’abadia benedetina de Nostra Sennora de Montserrat. In su guventu Fraciscanu de Barcelona at scerau definitivamenti sa bia de sa poburesa fendi professioni de fidi arrelijosa in su 1542.
Trasferiu in Tortosa, aundi dd’ant donau is fainas prus grais, ki issu fiat sempri cun grandi diligèntzia, at cumentzau a essi connotu po is poderis de sanadori e taumaturgu, benendi a essi pobulari meda intr’e sa genti.
Mancai biviat custa condizioni sua cun grandu umilidadi, custu donu dd’at inimicau meda de is cunfradis suus, ki ddu cunsiderant finsas indemoniau.
Po medas annus at peregrinau de unu guventu a s’atru e in dònnia logu si torrada a ripiti sa matessi cosa: milagrus e prodijus e disamistadis noas.
De Tortosa dd’ant mandau a Bellpuig, e fac’ ‘e su 1559 in Horta in sa meria de Tarragona (Catalùnnia), aundi est abarrau 12 annus, fendi innoi puru unu sçacu mannu de milagrus. Innoi dd’iant cambiau su nòmini in Fra’ Alfonsu po circai de ddu stesiai de is fidelis suus, ma a sa fini fut stesiau de-i custu guventu puru.
Arribau a Reus at connotu atras persighitzionis, benendi stesiau de innoi puru e mandau torra a Barcelona. A innoi dd’ant finsas denunçau a sa Santa Incuisitzioni ki perou no at agatau peruna crupa in issu.
S’urtimu tapa de su calvàriu suu est sa citadi de Casteddu de Càlari aundi in su 1565 arribat in su guventu de Santa Maria de Gesusu de s’òrdini de is fradis minoris franciscanus in su bixinau de sa Marina, aundi at pòtziu finalmenti agatai unu pagu de paxi. Innoi puru at fatu milagrus e prodijus, ma fut acetau beni de sa comunidadi e de sa citadi.
Est mortu su 18 de martzu de su 1567 curpiu de una maladia violenta, in su guventu de Santa Maria de Gesusu.
In su 1718 su guventu de Santa Maria de Gesusu dd’ant sçusciau po afortiai is murus e is bastionis de sa Marina, e insandus su corpus suu ddu traslant in sa crèsia de Santu Maurru.
In su 1740 s’òrdini de is fradis minoris pigant a seu sa crèsia de Santa Arrosalia, sempri in su bixinau de sa Marina, ki dda acalasçant po ddus podi aculli, e insandus in su 1758 su corpus de Fra Srabadori puru ddu traslant a innoi.
Su 17 Abrili de su 1938 Paba Piu XII dd’at fatu Santu. Su corpus suu est oi strèrriu in s’artari mannu de sa crèsia de Santa Arrosalia a intrus de sa teca musoleu obra de s’artista arromanu Antonio Bellini.
