Is Curadorias o Partis fiant is pretziduras territorialis ki formant is cuatru urrennus mesuevalis sardus.  Dònnia urrennu fiat pretziu in curadorias.  S’organizatzioni de custas entidadis territorialis no agatat ogualis in atrus Stadus de su mesuevu europeu.

Is curadorias fiant distretus aministrativus studiaus po tenni jai jai su matessi nùmeru de abitadoris; insa’ is curadorias prus piticas finat is prus densamenti pobuladas, e is prus mannas teniant una densidadi prus basça.

Is curadorias fiant arrejas de su curadori, e teniant deretu a espressai unu arrapresentadori a intrus de su parlamentu de s’urrennu ki ddi narant “Corona de Logu“. Is eletzionis de custu arrapresentadori fiat eliju de is òminis liberus, e sa di’ de is eletzionis fiat annunçada de unu bandidori ki ghetat su bandu peri totus is biddas de sa curadoria.

Is logus de is adunàntzias si narant “golletorgius” (ingollidroxus), e fiant o anant’e sa crèsia, o in sa domu de su curadori, e a bortas fintzas in-d unu nuraxi.

Sa cosa stravanada est ki totu sa fasi eletorali, de su bandu a s’eligidura de s’arrapresentanti de sa curadoria in sa corona de logu, no duràt prus de 20 diis, amostendi unu automatismu e una eficèntzia ki est stravanada no sceti po cussus tempus, ma po oindi’ puru!

Custas unidadis territòrialis funt abarradas is pròpias finsas candu is cuatru urrennus si funt a bellu a bellu disgregaus a suta de sa pressioni de is potèntzias allenas. Candu is Cadelanus-Aragonesus conkistant sa Sardìnnia, dda pretzint in fèudus, ki fiant is curadorias e totu, e mancai unas cantu de-i custas ddas ant acorpadas, is mraxinis sighint a essi is matessis de su tempus mesuevali, sikè, is nòminis de is arrejonis stòrigas de sa Sardìnnia, ki funt is de is fèudus spanniolus, sighint po sa mayoria a essi is de is curadorias.

In totu nci fiant 60 curadorias pretzias in cuatru urrennus: 16 in s’urrennu de Càlari, 13 in su de Arbarè, 20 in su de Dore, e 11 in su de Gaddura. Is Brabaxas fiant beni pretzias intr’e is cuatru urrennus.

Innoi a suta si podit mirai sa mapa de is curadorias sardas:

1: Cìvita, 2: Dèximu, 3: Nora, 4: Sulcis, 5: Cixerri, 6: Gippi, 7: Dolia, 8: Nuràminis, 9: Trexenta, 10: Siurgus, 11: Gerrei, 12: Colostrai, 13: Sarrabus, 14: Kirra, 15: Ollastra, 16: Brabaxa de Seulo, 17: Brabaxa de Brebì, 18: Mandrolisai, 19: Brabaxa de Ollolai, 20: Guilcer, 21: Barigadu, 22: Balentza e Brabaxana, 23: Marmidda, 24: Useddus, 25: Montis, 26: Bonorzuli, 27: Campidanu de Simaxis, 28: Campidanu mayori, 29: Campidanu de Milis, 30: Montiferru, 31: Pranàrja, 32: Màrghine, 33: Dore – Oroteddi, 34: Goceanu, 35: Costabadde, 36: Caputabbas, 37: Nurcara, 38: Nulàuro, 39: Ulmetu, 40: Nurra, 41: Flumenarja, 42: Romanja, 43: Coros o Campulongu, 44: Montes, 45: Figulina, 46: Meilogu – Oppia, 47: Nughedu, 48: Monteacutu, 49: Anglona, 50: Taras, 51: Gèmini, 52: Montanea, 53: Canahim, 54: Balayana, 55: Unali, 56: Fundimonte, 57: Orfili, 58: Posada, 59: Brabaxa de Bithi, 60: Orosei – Garteddi.