S’arti e s’arkitedura in Sardìnnia funt po su prus de importatzioni, perou meda ‘ortas su ki arribat in s’ìsula benit torrau a elaborai e akirit una sensibilidadi tìpiga de sa manera de essi sarda.

Calincunu periodu stòrigu si distinghit po essi lassau in Sardìnnia grandu tesorus de arti.

A innantis de totu sa Sardìnnia tenit su primau de essi fatu nasci sa primu grandu cultura de su Mesuterràneu de scurigadroxu, ki de is diferentis curturas preistòricas ant donau vida fac’‘e su 1.500 a.C a sa civilidadi nuràgiga. Custa civilidadi est de importu mannu ca rapresentat su puntu de atòbiu intr”e sa curtura megalìtiga de su scurigadroxu e sa curtura urbana de su Mesuderràneu de obrescidroxu. Is costrutzionis megalìtigas perfetas de s’arti nuràgiga funt intr’‘e is fabricas prus grandiosas de tota s’edadi de su brunzu

A pustis de is arrelatas cun is Feniçus e is Cartaginesus, Arroma conkista sa Sardìnnia in su 238 a.C. e duncas est una de is primus arrejonis extra italianas a essi latinizada. Arroma donat a sa Sardìnnia sa fisionomia urbana, economica e soçali ki est a sa basi de sa Sardìnnia mesuevali.

Un atru tempus fondamentali po sa stòria sarda est s’aministratzioni bizantina, ki ‘onat unu imprinting forti meda ki at a serbiri cumenti puntu de partèntzia po sa strutura de is cuatru urrennus juixalis.

Su mesuevu, sinnau de sa presèntzia de is cuatru urrennus juixalis de Càlari, Dore, Arbarè e Gaddura, est unu tempus de grandu fervori artìstigu, favorèssiu de is urreis juixalis ki tzerriendi maistus famaus de sa Provèntza, de sa Lombardia e de sa Toscana ant donau vida a sa tèmpora stravanada de s’arromanicu sardu.

Cun sa conkista de sa Sardìnnia de parti de is Cadelanus-Aragonesis, benit bittia in Sardìnnia una sensibilidadi artìstiga noa, ki est cussa pròpria de su gòtigu. Una de is formas de arti ki benit bitia est sa de s’arretaulu, ki benit luegus metabolizada de is pintoris localis, finsas a formai in Sardìnnia una scola totu sarda ki superat is maistus cadelanus e ki abarrat bia finsas a su ‘600. Seus kistionendi de sa scola de Stampaxi e de is pintoris Miali e Perdu Càvaro, ma puru de su Maistu de Casteddu Sardu, de su de Othieri, de Antiogu Mainas ecc. Custu fiat unu tempus candu, sendi sa Sardìnnia parti de unu grandu imperu, e Casteddu una citadi mercadera, s’arti froriàt.

Sighit unu tempus de lenta decadèntzia ki coincidit cun sa decadèntzia de s’imperu spanniolu, ki is formas artìstigas ki eus nau a pitzus si ripitint a arroscidura, e ki cun s’arribu de is Savoyas, acabant po sèmpri, ca arribat unu stili nou bitiu de is meris nous, ki cunsiderànt s’arti de is pintoris e picaperderis sardus, un’arti pobora ki no meresciàt de essi adelantada.

S’800 est su sègulu ki bit dus personalidadis, una in s’arkitetura e s’atra in sa pintura a tenni su primau de s’arti sarda essendi metabolizau prenamenti is maneras bitias de su Piemonti, ki funt Gaetanu Cima, teorigu de sa limpiesa cràssiga e Juanni Marghinotti.

Ma est cun s’inghitzu de su ‘900 ki in Sardìnnia nascit una generazioni noa de artistas ki ant a donai unu arrastu diaici forti a s’arti sarda ki si binti is infruentzias ancora oi. Is istantzias de is secessionis artìstigas, e s’infruèntzia se su costumbrismu spanniolu, donat sa scusa in Sardìnnia de inbentai una pintura ki contàt de su pòpulu fieru sardu, in-d’una dimensioni jai jai mìtiga, una mitologia ki teniàt cumenti protagonistas, pastoris, sonadoris de launeddas, messayus e messayas, e su paesaju sardu. Seus naturalmente kistionendi de Jusepi Biasi, Filipu Figari, Franciscu Çusa, Eugèniu Tavolara, Felici Melis Marini ecc.

S’arkitedura popolari merescit unu arremoni particulari ca surprendit po s’originalidadi sua e sa variedadi de is formas, fendi meresci a sa Sardìnnia s’allominju de "jai jai contineti", no sceti po sa variedadi de is paesajus naturalis, ma po cussa antropicu-curturali puru.

A segundu de s’arrejoni aundi nascit, pranus, montis, costas, ecc, e de sa consighenti funzioni, si format struturas arkitetonicas particularis ki funt frutu de sa cultura propiamenti sarda.

Formas arkitetònigas popolaris sceti sardas funt is domus campidanesas, is cumbessias o muristenis, is cresieddas de sartu cun lolla, is pinnetas e atras.