Villa Santa Maria – Pula

Posted by Andrea on 28 febbraio 2011

Pula

Stòria

Sa villa dd’at progetada Tatanu Cima in su 1838 po su cònsoli de marina Giusepi Ángiulu Randaccio. Sa villa ddi nant de Santa Maria ca in su terrenu aundi surgit nci fiant is arrastus de una crèsia dedicada a Santa Maria Pipia (Santa Mariedda), intitolatzioni chi ndi benit de s’arritu bizantinu, insandus si pensat chi sa crèsia chi nci fiat prima depiat essi antiga meda, a su mancu primu giuixali. Sa crèsia perou fiat aundi imoi nc’est su Campu Santu de Pula, est a nai unus 100 metrus prus a innantis, ma totu custu terrenu fiat de propriedadi de is Randaccio. Oi sa villa surgit a intrus de sa bidda de Pula, ma candu dd’ant fabricada arresurtàt essi in su sartu a sa carrera chi bitit a Nora.

Sa villa est vincolada de sa Soprintendèntzia de is bellas Artis, e dd’ant decrarada monumentu natzionali. In su 1985 is postas italianas dd’ant dedicau unu francubullu.

.

Sa strutura de sa villa

Tatanu Cima espressat in custa villa, prus de calichisiat obra sua, sa concetzioni sua de s’architetura civili moderna. Mancai custa iat depi essi una domu de sartu, sa villa no tenit nudda de “rùstigu”, ma presentat su naturali de una villa urbana cun frageri.

Una grandu cancellada, castiada a is costaus de duas scurpiduras de lioni (chi oi funt unu pagu smurruceddaus), est in assi cun su mori scenogràfigu chi tenit a sfundu s’afaciada. Custa est pretzia in dus òrdinis chi pògiant a pitzus de unu basamentu artu e est precèdia de una scalera a tenalla cun a centu unu grandu nìciu. Su primu òrdini est su chi donat su naturali a totu s’afaciada cun su colunnau monumentali  de òrdini dòrigu.

.

Sa villa est struturada a giru de sa grandu rotunda chi a foras, a s’afaciada de palas,  format una grandu àbsida chi pigat totu s’artària de s’edifìtziu. A intrus de sa rotunda nc’est su saloni de rapresentàntzia, s’aposentu de arriciri, chi pigat is dus pranus de sa villa e est coberta de una grandu cùpula decorada a lacunaris afriscaus. Sa struturatzioni a giru de una grandu rotùnda preannùnciat sa solutzioni chi Tatanu Cima at a imerai in s’uspidali civili de Casteddu.

.

S’arredamentu originali nc’est ancora, mancai a dolu mannu meda cosas ddas ant spèrdias, cumenti meda pomentus arregiòlaus chi imitànt is mosàigus de sa citadi de Nora, sostituius de arregiòla moderna.

.

A giru de su corpus centrali de sa villa nci funt meda cortis, pratzas, staddas e lollas, ca funt is ambièntis de manixu. Custas struturas apartenìnt in prenu a sa tipologia architetòniga campidanesa prus tìpiga.

.

Iat essi una grandu cosa po sa comunidadi a tenni a dispositzioni unu beni diaici importanti che custa villa, ma po imoi totus is tratativas chi nci funt stètias cun is meris no ant bitiu a nudda.

.

Bibliografia:

Is disìnnius originialis de is progetus de Tatanu Cima ndi benint de su volumu “Architettura dal tardo ’600 al classicismo purista” pubricau de Ilisso.

3 Responses to Villa Santa Maria – Pula

  1. Jacu

    Bella! Chissà se un giorno si potrà visitare.

Lascia un Commento

L'indirizzo email non verrà pubblicato. I campi obbligatori sono contrassegnati *

*

È possibile utilizzare questi tag ed attributi XHTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>